X’inhi t-terapija?

Spiss naħsbu li t-terapija hija xi ħaġa fejn tmur titkellem jew tiftaħ qalbek ma’ professjonist. Madanakollu, it-terapija taf toffri ħafna iktar minn hekk. Tista’ tkun spazju sigur fejn tagħraf diffikultajiet u l-impatt li qed ikollhom fuq ħajtek, u ssib mezzi ta’ kif taffaċċjahom b’modi differenti.

X’inhi l-psikoterapija?

Il-psikoterapija, spiss magħrufa bħala t-terapija mitkellma, hija proċess fejn professjonisti mħarrġin fis-saħħa mentali u oqsma relatati, jibnu relazzjoni professjonali u terapewtika mal-persuni li jersqu għandhom, sabiex jindirizzaw u jimmaniġġjaw sfidi psikoloġiċi u emozzjonali. It-terapija hija process kollaborattiv bejn it-terapist/a u l-klijent/i, bil-għan li jiġu esplorati ħsibijiet, sentimenti, u mġieba, biex tiffaċilita t-tkabbir personali, ittaffi emozzjonijiet jew sintomi diffiċli, u ttejjeb is-saħħa mentali u l-benesseru tal-individwu. Dan il-proċess jipprovdi lill-klijenti spazju sigur biex jesprimu ruħhom mingħajr biża’ ta’ ġudizzju, f’ambjent fejn ħa jirċievu appoġġ u gwida. Il-psikoterapija toffri wkoll il- kunfidenzjalità, fejn dak li jingħad jibqa’ biss bejn il-professjonisti u l-klijenti, diment li ma jkunx hemm riskji serji fejn il-klijenti stess jew nies oħra jistgħu jkunu f’periklu. Is-sessjonijiet jistgħu jkunu individwali, mal-koppji, mal-familji, jew anke fi gruppi, skont il-bżonnijiet tal-klijenti u l-kwistjonijiet li jkunu qed jiġu ndirizzati.

 

X’inhi d-differenza bejn li titkellem mal-ħbieb u titkellem ma’ psikoterapista?

Li titkellem ma’ ħbieb jew qraba li tafda u li tħoss li jridulek il-ġid, kapaċi tkun xi ħaġa pożittiva ħafna. Pero’, meta persuni tal-qalb jagħtuna parir, ħafna drabi dan il-parir ikun ġej minn post ta’ ħafna’ emozzjonijiet varji lejna, u anke opinjonijiet personali. F’relazzjonijiet intimi, il-konversazzjonijiet huma ħafna drabi reċiproki, u allura faċli li l-ħbieb jirrelataw dak li qed titkellem fuqu inti ma’ esperjenzi personali tagħhom. Għalhekk il-konversazzjoni tieħu xejra differenti, u l-attenzjoni tinqasam fuqkom it-tnejn. Avolja din kultant tkun ta’ ġid, tista’ wkoll ittellef, minħabba li d-diskors kapaċi jkun suġġettiv ħafna. Fit-terapija, il-professjonisti huma mħarrġin biex jieħdu lenti oġġettiva u biex jinnutaw ċertu mudelli ta’ ħsieb u mġieba li persuni li jkunu drawna ħafna, jaf ma jkunux jistgħu jgħarfuhom jew jispjegawlna minn fejn ġejjin. Fit-terapija nistgħu wkoll nitgħallmu kif nibdlu ċertu mġieba jekk ikun hemm il-bżonn. Apparti minn hekk, minħabba li r-relazzjoni terapewtika tiffoka fuq il-klijenti, u hemm konfini ċari bejn it-terapista u l-klijent, din il-konversazzjoni qatt m’hi se ddur u ssir dwar it-terapista, jiġifieri l-konversazzjoni u l-attenzjoni tibqa’ dejjem fuq il-klijent biss.

 

Kemm hu twil il-proċess tat-terapija?

Bħal kull progett ieħor fil-ħajja, bħal meta nibdew nitgħallmu sport ġdid jew meta nkunu qed nidraw irwol ta’ xogħol ġdid, il-ħidma fuqna nfusna u fuq il- personalità tagħna tieħu ż-żmien tagħha. Ħafna drabi jkollna bżonn ammont ta’ ġimgħat jew xhur biex naraw it-tibdil li nixtiequ, dejjem skond xi jkunu d-diffikultajiet li nkunu qegħdin inressqu, u kemm inkunu lesti li naħdmu biex naslu fejn nixtiequ. L-ewwel ftit sessjonijiet ħafna drabi jintużaw għal-assessjar, fejn it-terapista tistaqsi għal iżjed informazzjoni dwar il-persuna u l-istorja tagħha. Fiż-żmien tal-assessjar, it-terapista flimkien mal-klijent jifthiemu fuq x’ħa jkunu l-għanijiet tat-terapija u fejn jixtiequ jaslu. Imbagħad wara l-assessjar huwa fejn verament jibda x-xogħol terapewtiku, minħabba li l-klijent ikun laħaq dara lit-terapista iżjed, u t-terapista jkollha biżżejjed informazzjoni biex tigwida lil dak li jkun biex jimxi l-quddiem. Ħafna drabi, il-massimu ta’ sessjonijiet li wieħed ikollu huwa dak ta’ darba fil-ġimgħa, biex il-klijent ikollu ċans jipproċessa dak li jkun ġara fis-sessjonijiet, u jkollu ċans jaħdem fuq l-affarijiet miftiehma. Il-mod ta’ kif isir l-assessjar u kemm idum, u anke l-frekwenza tas-sessjonijiet jista’ jvarja għax jiddependi minn kif j/taħdem il-professjonist/a.

 

Kif nista’ nkun naf jekk it-terapista li nkun għażilt, tkunx l-aħjar professjonista biex tgħinni?

Ħafna drabi, speċjalment fil-kuntest ta’ Malta, persuni li jkunu marru t-terapija u ħassew li għenithom, għandhom tendenza jirrikomandaw lit-terapist/a tagħhom lil ħbieb, kollegi jew nies oħra li jkunu qed ifittxu l-għajnuna. B’hekk, dak li jkun, diġa jista’ forsi jserraħ ftit moħħu, li jaf xi ħaġa dwar il-professjonista li ħa jkun qed jiltaqa’ magħha. Dan minħabba li huwa komuni u naturali li nħossuna ftit skomdi jew ansjuzi meta nkunu ħa niltaqgħu ma’ xi ħadd ġdid. Fl-ewwel sessjoni, huwa tajjeb li naraw jekk ikollniex xi mistoqsijiet u/jew jekk l-affarijiet humhiex ċari fejn jidħol il-protokoll tat-terapija. Dan kollu jista’ jiġi diskuss, flimkien ma’ mistoqsijiet dwar it-taħriġ u l-ispeċjalizzazzjonijiet tat-terapista. Tajjeb ukoll li ninnutaw jekk inħossunix komdi u sikuri fil-preżenza tat-terapista. Avolja din ma tinħassx u ma tidhirx mal-ewwel, imma ħafna drabi, malajr ikollna indikazzjoni dwar jekk naqblux jew immorrux tajjeb jew le mat-terapista tagħna. Dan kollu jista’ jindikalna jekk inkunux għamilna għażla tajba, u jekk ma jkunx il-każ, inkunu nistgħu nistaqsu lil xi professjonista differenti. Tajjeb li ngħidu ukoll li ċertu organizazzjonijiet li huma relatati mal-qasam tas-saħħa mentali, ukoll ikunu jistgħu jagħtu rikomandazzjonijiet għand min wieħed jista’ jfittex l-għajnuna, skond id-diffikultà li persuna tkun tixtieq is-sapport għaliha.

Allura,

Il-psikoterapija tista’ ttina għodda biex nindirizzaw fierxa wiesa’ ta’ suġġetti u sfidi personali. Din ir-relazzjoni professjonali hija mibnija fuq fiduċja u empatija u tista’ tkun riżorsa ta’ valur għal min qed ifittex li jtejjeb is-saħħa mentali u l-benesseru tiegħu. It-terapija toffrilna spazju biex nifhmu aħjar lilna nfusna u l-istorja tagħna, filwaqt li tinkoragixxina biex dejjem nagħmlu dak li huwa tajjeb għalina mingħajr ma ssir ħsara lejn ħadd. Ir-relazzjoni terapewtika kapaċi tkun speċjali ħafna, u hija relazzjoni li tista’ tibqa tikber matul is-snin.